Azərbaycan, Bakı, 12 noyabr / Trend , müxbir C.Babayeva/ AzərbaycanYaşıllar Partiyası 2009-cu il üçün fəaliyyət proqramını açıqlayıb.
"Gələn il partiyanın fəaliyyət proqramında üç əsas istiqamət durur - Gürcüstan Yaşıllar Partiyası ilə siyasi tədqiqatların aparılması, "Yaşıl Alternativ" qəzetinin nəşrinə başlanması və etiraz aksiyalarının keçirilməsidir", - deyə Azərbaycan Yaşıllar Partiyasının (AYP) sədri Mais Güləliyev çərşənbə günü Trend -a məlumat verib.
Güləliyev Gürcüstanın Yaşıllar Partiyası ilə təsdiq olunmuş tədbirlər planına əsasən, gələn il birgə üç etiraz aksiyası keçirəcəklərini bildirib. "Aksiyalarda NATO-nun Qafqazda genişlənməsinə, transsərhəd rayonlarda ekoloji vəziyyətə, Qafqaz regionunda atom elektrik stansiyalarının tikintisinə etiraz bildiriləcək", - deyə AYP sədri bildirib.
O, gələn il sədri olduğu partiyanın təşkilatçılığı ilə Bakı və Sumqayıtın, Azərbaycanın regionlarında ekoloji vəziyyətə dair ekoloji maarifləndrimə, Xəzərin hərbiləşməsinin əleyhinə aksiyalar keçiriləcəyini də bildirib.
Trend -un arayışı: Azərbaycanın Yaşıllar Partiyası 2006-ci ilin dekabrında yaradılıb və Ədliyyə Nazirliyində dövlət qeydiyyatına alınmayıb. AYP Avropa Yaşıllar Partiyasında müşahidəçi statusu alıb.
Məqalə müəllifi ilə əlaqə saxlamaq üçün ünvan: [email protected]