Azərbaycan, Bakı, 12 noyabr/ Trend , müxbir A.Hüseynbala/ Azərbaycanın bəzi müxalifət partiyaları bələdiyyə seçkilərində əməkdaşlıqla bağlı danışıqlara başlayıb.
"Azərbaycan Milli İstiqlal Partiyasının (AMİP) lideri Etibar Məmmədovla apardığımız ilk müzakirələr uğurlu alınıb. Bir neçə partiya ilə də gələcək əməkdaşlıqla bağlı danışıqlar davam edir", - çərşənbə günü Trend -a Demokratiya Uğrunda İttifaqda təmsil olunan Böyük Azərbaycan Partiyasının (BAP) sədri Elşad Musayev bildirib.
Trend -ın arayışı: Azərbaycanda bələdiyyə seçkiləri 2009-cu ilin dekabr ayında keçiriləcək. Oktyabrın 15-də keçirilən prezident seçkisindən sonra müxalifətin əməkdaşlıq məsələsi gündəmə gəlib.
Demokratiya Uğrunda İttifaqda müxalifətçi Klassik Xalq Cəbhəsi, Azadlıq, Milli Demokratiya və Böyük Azərbaycan partiyaları təmsil olunur. İttifaq bu partiyaların məşvərət və əməkdaşlıq qurumudur.
Onun sözlərinə görə, AMİP-lə əməkdaşlıq Demokratiya Uğrunda İttifaqa daxil olan partiyalar çərçivəsində aparılacaq.
"Biz müxalifətin bələdiyyə və parlament seçkilərində birgə iştirakını da istisna etmirik. Amma indi sadəcə əməkdaşlığın perspektivləri müzakirə olunur", - Musayev deyib.
AMİP-in təbliğat və informasiya katibi Əli Orucov çərşənbə günü Trend -a açıqlamasında danışıqların aparıldığını təsdiqləyib.
"Klassik Xalq Cəbhəsi və Böyük Azərbaycan partiyalarının rəhbərləri ilə bələdiyyə seçkisində əməkdaşlıqla bağlı müzakirələr aparırıq", - Orucov bildirib.
Onun dediyinə görə, danışıqların növbəti mərhələsində KXCP və BAP sədrləri Mirmahmud Mirəlioğlu ilə Elşad Musayevin Etibar Məmmədovla təkbətək görüşü də olub: "Əməkdaşlıqla bağlı konkret razılaşma yoxdur. Amma bəzi məsələrlə bağlı ilkin razılaşma əldə olunub", - Orucov vurğulayıb.
AMİP funksioneri müzakirələrdə əsas məqsədin bələdiyyə seçkisində əməkdaşlıq istiqamətlərini müəyyənləşdirmək olduğunu qeyd edib.
"Biz də bələdiyyə seçkisi ərəfəsi müxalif qüvvələrin əməkdaşlığının genişlənməsinin tərəfdarıyıq. Zərurət yaranarsa, hətta blok yaratmaq məsələsi də gündəmə gələ bilər", - Orucov deyib.
AMİP-in katibi müzakirələrin DUİ-də təmsil olunmayan digər partiyalarla da aparıldığını bildirib.
Məqalə müəllifi ilə əlaqə ünvanı: [email protected]