Azərbaycan, Bakı, 27 noyabr/ Trend , müxbir A.Hüseynbala/ Azərbaycanda Müxalifətin Əməkdaşlıq Mərkəzinin (MƏM) nümayəndələri Bakı şəhər İcra Hakimiyyətinin başçısı Hacıbala Abutalıbovun məhkəmədə şahid kimi ifadə verməsini tələb ediblər.
"Səbayel rayon Məhkəməsində keçirilən prosesdə MƏM-in vəkilləri Hacıbala Abutalıbovun və Bakı şəhər İcra Hakimiyyətinin ictimai təşkilatlar və siyasi partiyalarla iş şöbəsinin müdiri Zaur Ramazanovun şahid kimi məhkəməyə dəvət olunması üçün vəsatət qaldırıblar", - cümə axşamı Trend - a MƏM - də təmsil olunan Vətəndaş və İnkişaf Partiyası sədrinin müavini Büllur Hümbətov bildirib.
Trend - un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiyası və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Bakı şəhər İcra Hakimiyyəti oktyabrın sonundan bəri mitinq keçirmək üçün MƏM - in istədiyi meydanlarda kütləvi aksiyalara icazə verməyib.
Hümbətovun sözlərinə görə, hakim vəsatətin təmin olunmaması haqda qərar çıxarıb. "Digər vəsatətlərimizi təmin etməyən hakim prosesi dekabrın 3 - dək təxirə salıb", - Hümbətov deyib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar üzündən müxalifətin geniş koalisiyasının yaranması baş tutmur.
Məsələ ilə bağlı Bakı şəhər İcra Hakimiyyətinin ictimai təşkilatlar və siyasi partiyalarla iş şöbəsinin müdiri Zaur Ramazanovdan münasibət öyrənmək mümkün olmayıb.
Məqalə müəllifi ilə əlaqə ünvanı: [email protected]
