Azərbaycan, Bakı, 07 yanvar / Trend , müxbir A.Hüseynbala/ Azərbaycanda iqtidarla müxalifətin hansısa məsələni müzakirə etməsi üçün heç bir problem yoxdur.
"Bunun üçün xüsusi dəvət gözləməyə ehtiyac yoxdur. İqtidarın qapıları həmişə cəmiyyətin istənilən təbəqələrinə açıqdır. İstənilən şəxs, yaxud siyasi qüvvə öz mövqeyini istənilən səviyyədə çatdıra bilər", - çərşənbə günü Trend -a hakim Yeni Azərbaycan Partiyası (YAP) Siyasi Şurasının üzvü, millət vəkili Aydın Mirzəzadə bildirib.
Trend - un arayışı: 2005 - ci ilin parlament seçkiləri ərəfəsində ATƏT-in Bakı ofisinin vasitəçiliyi ilə müxalifət, hakim və hakimiyyətyönlü partiyalar arasında bir necə görüş keçirilib. Sonradan dialoqu davam etdirmək mümkün olmayıb. Ötən il oktyabrın 15-də keçirilmiş prezident seçkisində bir neçə müxalifət partiyası YAP-ın namizədini dəstəkləyib. Seçkidən sonra YAP-ın bu partiyalarla dialoqu məsələsi yenidən gündəmə gəlib.
Azərbaycanın hakim Yeni Azərbaycan Partiyası icra katibinin müavini, deputat Siyavuş Novruzov ötən ilin dekabr ayında Trend -a deyib ki, partiya müxalifətlə heç bir şərt irəli sürmədən dialoqa hazırdır.
Mirzəzadənin sözlərinə görə, parlamentdə təmsil olunan partiyaların rəhbərləri təkliflərini buradakı tribunadan səsləndirə bilərlər: "Bundan başqa, onlar Prezidentin İcra Aparatına, hakim partiyaya müraciət edib, istənilən məsələnin müzakirəsini təklif edər, hətta bir çox məsələ ilə bağlı müzakirələr də keçirə bilərlər," -o əlavə edib.
Hakim partiya təmsilşisi deyib ki, ilk növbədə, dialoqun nə demək olduğu bir daha dəqiqləşdirilməlidir: "Təəssüf ki, bizim tərəf müqabillərimiz dialoqu ancaq qarşı-qarşıya oturmaq kimi başa düşürlər. Dialoq bir-birini dinləmək mədəniyyətidir, bir - birinin mövqeyini aşıq şəkildə bidirmək hüququnun tanınması deməkdir", - millət vəkili vurğulayıb.
Mirzəzadənin fikrincə, parlamentdə, kütləvi informasiya vasitələrində, ayrı-ayrı məclislərin tribunasında müxtəıif fikirlər səslənirsə və buna görə heç kəs təqib edilmirsə, bu da dialoqun bir formasıdır: "Müxalif mövqedə duran qüvvələr həmişə iqtidara nisbətən daha çox iddialı olurlar. Onlar mövcud və fərqlı, ən əsası, iqtidardan daha yaxşı işləmək qabiliyyətində olduqlarını həmişə nümayiş etdirməyə çalışırlar", - YAP funksioneri deyib.
"Azərbaycanda iqtidar -
müxalifət dialoqunun baş tutması artıq
inandırıcı görünmür. Dialoqun
keçirilməsi məsələsində
müxalifətdən heç bir maneə yoxdur. Amma
münasibətlərin sivil inkişaf etməsi iqtidarın
maraq dairəsində deyil", - çərşənbə
günü Trend -a müxalif Böyük Quruluş
Partiyasının (BQP) başqanı, millət vəkili Fazil
Mustafa bildirib.
Onun sözlərinə görə, referenduma hazırlq
mərhələsində hətta parlamentdə təmsil olunan
partiyalarla məsləhətləşmə aparılmadı.
BQP başqanının fikrincə, beynəlxalq təşkilatlar üçün lazım olan anda hakimiyyət müxalifətə ehtiyac olduğunu bəyan edir: "Əvvəl elə düşünürdüm ki, iqtidarın bu mövqeyi radikal müxalifətə görə formalaşıb. Amma indi məlum olur ki, ümumiyyətlə, parlamentdə də müxalifətlə hər hansı məsələni müzakirə etmək mühiti bilərəkdən yaradılmadı", - millət vəkili vurğulayıb.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir.
Müxalifətyönlü Böyük Quruluş Partiyası 2004 - cü ildə yaradılıb, 2005 - ci ildə dövlət qeydiyyatına alınıb. Partiyanın sədri Fazil Mustafa (Fazil Qəzənfəroğlu) Milli Məclisin deputatıdır. Partiya sədri 2008-ci ildə keçirilmiş prezident seçkisində namizəd olub və 2,4 faiz səs toplayıb.
Məqalə müəllifi ilə əlaqə ünvanı: [email protected]