Azərbaycan, Bakı, 07 yanvar / Trend , müxbir A.Hüseynbala/ Azərbaycanın müxalifət partiyası referendumda demokratik ictimaiyyətin mövqeyini təmsil etmək məqsədilə Təşviqat Qrupu yaradıb.
"Təşviqat Qrupuna partiyanın başqanı İsa Qəmbər, rəhbərliyə daxil olan digər şəxslər, eləcə də bir sıra digər siyasi partiya və ictimai təşkilatların təmsilşiləri daxildirlər", - çərşənbə günü Trend - a Müsavat Partiyası Mərkəzi İcra Aparatının rəhbəri Arif Hacılı bildirib.
Onun sözlərinə görə, Təşviqat Qrupunun "Respublikaçılar" adlandırılması təklifi ilə çıxış edən təşəbbüsçülər yaxın günlərdə Təşəbbüs Qrupunun toplantılarını keçirməyi planlaşdırır.
"İlkin təşəbbüs qrupları Bakı, Sumqayıt, Gəncə şəhərlərində və ölkənin bir sıra rayonlarında yaradılacaq" - Hacılı əlavə edib.
Müsavat funksioneri deyib ki, "Respublikaçılar" Təşəbbüs Qrupuna referendumla bağlı təşviqat prosesində iştirak etmək niyyətində olan siyasi və ictimai təşkilat nümayəndələrinin cəlb olunması, eyni zamanda dıgər müxalifət təşkilatlarının təşəbbüsü ilə yaradılacaq təşviqat qrupları ilə sıx əməkdaşlıq edilməsi nəzərdə tutulur.
Azərbaycanda referendum martın 18 - də keçiriləcək.
Məqalə müəllifi ilə əlaqə ünvanı: [email protected]
