Azərbaycan, Bakı, 10 aprel / Trend , müxbir K.Zərbalıyeva /
Azərbaycanın milli təhlükəsizlik naziri Eldar Mahmudov Ukrayna Xarici Kəşfiyyat Xidmətinin sədrini qəbul edib.
MTN-in İctimai Əlaqələr Mərkəzindən cümə günü Trend -a verilən məlumata görə, milli təhlükəsizlik naziri, general-leytenant Mahmudov görüşdə Nikolay Malomucun ilk səfərini hər iki ölkənin müvafiq strukturları arasında əməkdaşlığın daha da inkişaf etdirilməsi istiqamətində atılan növbəti addım kimi qiymətləndirib.
Nazir Azərbaycanda təhlükəsizliyin təmin olunması, cinayətkarlıqla mübarizə sahəsində MTN tərəfindən görülən işlər barədə danışıb, Ermənistan-Azərbaycan Dağlıq Qarabağ münaqişəsinin doğurduğu fəsadlar və digər faktorlar, habelə bununla əlaqədar görülən adekvat tədbirlər barədə məlumat verib.
Görüşdə tərəflər arasında transmilli mütəşəkkil cinayətkarlıq, hazırda ən aktual problem olan terrorçuluqla mübarizə sahəsində görülən işlər, narkotiklərin qanunsuz dövriyyəsi, miqrasiya prosesləri, bundan irəli gələn məsələlərlə bağlı fikir mübadiləsi aparılıb, Ukrayna və Azərbaycanın xüsusi xidmət orqanları arasında işgüzar və səmərəli əməkdaşlığın inkişaf perspektivləri müzakirə olunub.
Qonaq Ukrayna və Azərbaycan, həmçinin müvafiq strukturlar arasında münasibətlərin inkişafından məmnun olduğunu, ötən gün Ukrayna Xarici Kəşfiyyat Xidməti və Milli Təhlükəsizlik Nazirliyi arasında əməkdaşlığa dair imzalanmış sazişin ölkələrimizin əlaqələrinin daha da möhkəmlənməsi üçün faydalı olacağına əminliyini qeyd edib.
Məqalə müəllifi ilə əlaqə ünvanı:[email protected]