"Gələn həftənin əvvəlində Pakistan nümayəndə heyəti İran-Pakistan-Hindistan boru kəməri ilə qaz ixracı üzrə müqavilənin detallarını sonuncu dəfə razılaşdırılmaq üçün İrana səfər edəcək", - bu kəmər üzrə İranın Neft Nazirliyinin xüsusi nümayəndəsi Hojatolla Qanimifard deyib, SHANA agentliyi xəbər verib.
"Pakistanın federal nazirlər kabineti İran qazının hesablanacağı qiymət formulunu qəbul edib və boru kəmərinin tikintisinə dərhal başlamağa çağırıb", - bir müddət əvvəl Pakistan informasiya naziri Kamar Zaman deyib, IRNA yazır.
İran və Pakistan arasında qazın qiymətinin müəyyən edilməsi üzrə uzun müddət fikir ayrılıqları olub, ancaq davamlı danışıqlardan sonra tərəflər razılığa gələ biliblər.
İran qazı Pakistana İran-Pakistan-Hindistan (İPİ) - "Sülh" adını almış qaz kəməri ilə nəql olunacaq. Pakistan ildə 2 milyard kubmetr qaz idxal edəcək.
Qaz kəməri başlanğıcını Buşir əyalətinin Assaluye rayonundan götürür. Onun yaxınlığında "Cənubi Pars" yatağı yerləşir və bu kəmər İran ərazisi üzrə təxminən 1 100 km uzanacaq. Pakistanda kəmər cənub-qərb əyaləti Baluçistan və cənub əyaləti Sind ərazisindən keçəcək.
Boru kəməri ilə bağlı tikinti işlərinin bu il başlayacağı və 2012-ci ilin sentyabrında başa çatacağı gözlənilir.