Azərbaycan, Bakı, 06 may / Trend , müxbir E.Tariverdiyeva /
Gürcüstan üzrə amerikalı ekspert Linkoln Mitçel hesab edir ki, yaxın vaxtlarda Gürcüstanda hakimiyyət dəyişikliyi az ehtimal olunur.
"Düşünürəm ki, müxalifətin nümayişləri ilə əlaqədar Gürcüstanda hökumət dəyişikliyi az ehtimal olunur", - deyə Trend -a elektron poçtla Kolumbiya Universitetinin professoru Mitçel bildirib.
Gürcüstan müxalifəti artıq bir aydır ki, Prezident Saakaşvilini postundan salmağa çalışır. Müxalifətin ilk aksiyası aprelin 9-da keçirilib.
Mitçelin rəyinə görə, hazırkı vəziyyəti aşağı səviyyəli böhran kimi xarakterizə etmək olar, lakin vəziyyət böyük böhrana şərait yaradan potensiala malikdir.
"Həm hökumət, həm də müxalifət bundan qaçmaq üçün birlikdə işləməlidir, həm də təkcə dialoq yolu ilə deyil, hər iki tərəfin fəaliyyəti ilə", - deyə ekspert bildirib.
Bununla yanaşı, onun sözlərinə görə, Gürcüstan müxalifətinin məqsədləri real deyil. "Ən yaxşı üsul hökumətin dəyişməsi deyil, hazırkı hökumətin siyasi kursunun dəyişdirilməsi ola bilərdi", - deyə Mitçel vurğulayıb.
Onun fikrincə, hökumət və müxalifət arasında dialoq kifayət qədər olmasa da, siyasətin mühüm hissəsidir. "Hökumət göstərilən konkret tədbirlər üzrə müxalifətlə dialoqun dəstəklənməsinə ehtiyac duyur", - deyə Mitçell vurğulayıb.
Məqalə müəllifi ilə əlaqə ünvanı: [email protected]