Azərbaycan, Bakı, 11 iyun / Trend , müxbir C.Babayeva /
Azərbaycanın müxalif Müsavat Partiyası bələdiyyə seçkilərində gənc üzvləri üçün kvota müəyyən edəcək.
"Bələdiyyə seçkilərində partiyanın namizədləri arasında gənclərə müəyyən yerin (faiz üzrə) ayrılması ilə bağlı partiya rəhbərliyi ilə qeyri-rəsmi razılıq əldə olunub. Partiya seçkilərdə daha çox gənclərin namizəd kimi iştirakına dəstək verəcək", - cümə günü Trend -a Müsavat Partiyasının gənclər təşkilatının sədri Tural Abbaslı bildirib.
Trend -un arayışı: Azərbaycanda bələdiyyə seçkilərinin bu ilin dekabrında keçirilməsi nəzərdə tutulur. Hazırda ölkədə 2757 bələdiyyə fəaliyyət göstərir. Bələdiyyələrin birləşməsindən sonra onların sayının 1766-ya enməsi gözlənir.
Abbaslı bildirib ki, müsavatçı gənclər şəhər və rayon bələdiyyələrinin 10 faizi üzrə namizədliklərini irəli sürəcəklər. "Gənclər partiyanın seçkilərdə tək iştirakının tərəfdarıdır. Partiya rəhbərliyinə seçkilərdə gənclər üçün müəyyən kvotanın ayrılması ilə bağlı müraciət olunub", - o deyib.
Abbaslı bələdiyyə seçkilərində öz namizədliyini də irəli sürəcəyini bildirib.
Gənclər təşkilatının sədrinin sözlərinə görə, partiya rəhbərliyi ilə, həmçinin parlament seçkiləri ilə də bağlı məsləhətləşmələr aparılır. "Parlament seçkilərində də namizədlər siyahısında müəyyən faizin gənclərə ayrılmasının tərəfdarıyıq", - Abbaslı deyib.
Trend -un arayışı: Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan Pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkilərində prezidentliyə namizəd olub. Pаrtiyа 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]