...

Azərbaycanın liberalyönümlü partiyalarının blok yaratmaq üçün ilkin məsləhətləşmələri başa çatıb

Siyasət Materials 22 İyun 2009 15:51 (UTC +04:00)

Azərbaycan, Bakı, 22 iyun / Trend , müxbir A.Hüseynbala /

Azərbaycanın liberalyönümlü müxalif partiyalarının bələdiyyə seçkilərində birgə iştirak etmək üçün yaradılacaq blokla bağlı məsləhətləşmələrinin birinci mərhələsi başa çatıb.

"Biz 12 partiyaya təkliflərimizi təqdim etmişik və iyul ayında məsləhətləşmələr yenidən davam etdiriləcək", - bazar ertəsi Trend -a Azərbaycan Liberal Demokrat Partiyasının (ALDP) sədri Fuad Əliyev bildirib.

Trend -un arayışı: Ötən ay Azərbaycan Parlamentində "Bələdiyyələrin birləşdirilməsi haqqında" qanun qəbul edilib.

Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.

Azərbaycanda bələdiyyə seçkisi 2009-cu ilin payızında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.

Əliyevin sözlərinə görə, əgər blok yaratmaq təklifləri reallaşarsa, məqsədləri təkcə bələdiyyə seçkilərində birgə iştirak edib uğur qazanmaqdan ibarət olmayacaq. "Biz seçki kampaniyası zamanı müxtəlif aksiyalar keçirib cəmiyyətdə liberal dəyərlərin mahiyyəti ilə də bağlı maarifləndirmə işi aparacağıq", - partiya sədri əlavə edib.

Onun fikrincə, müraciət etdikləri partiyalardan neçəsinin blok yaratmağa razılıq verəcəyini indidən söyləmək çətindir. "Biz məsləhətləşmələri tam başa çatdırmadan 12 partiyadan neçəsinin təklifimizi dəstəkləyəcəyini deyə bilmərik", - Əliyev qeyd edib.  

АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh İbadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti