Azərbaycan, Bakı, 01 iyul / Trend , müxbir A.Hüseynbala /
Türk Dövlətləri Parlament Assambleyasının Baş Katibliyinin Bakıda yerləşməsi üçün Azərbaycan hakimiyyətinə müraciət olunub.
"Bu məsələ türk dövlətlərinin prezidentləri arasında müzakirə olunmalıdır. Düşünürəm ki, müzakirələr nəticəsində istəyimiz reallaşacaq", - çərşənbə günü Trend -a Azərbaycan-Türkiyə Parlamentlərarası Əlaqələr üzrə İşçi Qrupunun həmsədri Nizami Cəfərov bildirib.
Trend -un arayışı: Ötən il İstanbulda keçirilən türkdilli dövlətlərin parlament başçıları konfransı çərçivəsində Azərbaycan, Qazaxıstan, Qırğızıstan və Türkiyənin daxil olduğu türkdilli dövlətlərin Parlament Assambleyasının təsis edilməsi barədə razılıq əldə olunub. Tədbirdə Özbəkistan və Türkmənistan iştirakdan imtina edib.
Cəfərovun sözlərinə görə, assambleyanın sentyabr ayında Bakıda keçiriləcək sammitində Özbəkistan və Türkmənistanın iştirakı məsələsi hələ də həll olunmayıb. "Bu iki dövlətin parlament nümayəndələrinin sammitdə iştirakı ilə bağlı problemin həlli üçün müzakirələr davam edir", - millət vəkili əlavə edib.
İşçi Qrupu həmsədrinin sözlərinə görə, sentyabr ayında Bakıda keçiriləcək sammitdə assambleyanın daimi işlək quruma çevrilməsi üçün yeni layihələr müzakirəyə çıxarılacaq.
"Assambleyanın Avropa Şurası Parlament Assambleyası kimi daimi katibliyi olan və fəaliyyət göstərən quruma çevrilməsi üçün müzakirələr aparılacaq", - Cəfərov vurğulayıb.
Məqalə müəllifi ilə əlaqə ünvanı:[email protected]
