Azərbaycan, Bakı, 17 avqust / Trend , müxbir C.Babayeva /
Müxalif Azərbaycan Milli İstiqlal Partiyası (AMİP) bələdiyyə seçkisi ilə əlaqədar koalisiya yaratmaq təkliflərini müzakirə etməyə hazırlaşır.
"Yay mövsümü ilə əlaqədar əksər siyasi qüvvələr istirahətdədir və cəmiyyətin özündə də o qədər fəallıq yoxdur. Sentyabrdan etibarən müzakirələrə start veriləcək. Partiya digər siyasi qüvvələrin koalisiya ilə bağlı təkliflərini dəyərləndirəcək", - bazar ertəsi Trend -a AMİP-in mətbuat və təbliğat katibi Əli Orucov bildirib.
Trend -un arayışı: Azərbaycanda bələdiyyə seçkisinin bu ilin dekabrında keçirilməsi nəzərdə tututlur.
Orucovun sözlərinə görə, koalisiya yaratmaq və ya imitasiya xatirinə bu işləri görmək əksinə, ümumi fəaliyyətə, cəmiyyətin birlik inamına zərbə vurur. "Ona görə də mövqe və prinsiplərimiz üst-üstə düşən siyasi qüvvələrlə bir araya gəlməyə çalışacayıq", - o deyib.
Partiyanın qurultayına gəlincə, AMİP rəsmisi bildirib ki, qurultayın keçirilmə vaxtı və yeri barədə qərarı Siyasi Şura qəbul etməlidir. "Çox güman ki, bələdiyyə seçkisi öncəsi partiyanın ali orqanının iclası baş tutacaq", - Orucov deyib.
Trend -un arayışı: AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
