Azərbaycan, Bakı, 04 sentyabr / Trend , müxbir A.Hüseynbala /
Azərbaycanın müxalifət hərəkatı Seçki Məcəlləsinə və digər qanunlara əlavə və dəyişikliklərlə bağlı təkliflərini gələn həftə parlamentə təqdim edəcək.
"Qanunvericilik təşəbbüsü qaldırmaq məqsədi ilə yaradılan işçi qrupunun bugünkü toplantısında Seçki Məcəlləsi ilə bağlı təkliflərimizin hamısı razılaşdırılıb", - cümə günü Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədr müavini Taliyət Əliyev bildirib.
Trend -un arayışı: "Qarabağ və Respublika Uğrunda Hərəkat"ı Konstitusiyaya təklif edilən əlavə və dəyişikliklərlə bağlı 2009-cu il martın 18-də keçirilən referendum zamanı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları təsis edib.
Əliyevin sözlərinə görə, işçi qrupu "Siyasi partiyalar haqqında", "Sərbəst toplaşmaq azadlığı haqqında" və "Bələdiyyələrin statusu haqqında" qanunlara dəyişikliklər və əlavələr edilməsi üçün təkliflər paketi hazırlayır. "Proses gələn həftənin əvvəllərində başa çatdırılacaq və bundan sonra sənədi Milli Məclisə təqdim edəcəyik", - sədr müavini əlavə edib.
Partiya funksioneri deyib ki, Mərkəzi Seçki Komissiyasının və digər seçki komissiyalarının tərkibinin formalaşdırılması ilə bağlı ADP-nin irəli sürdüyü təklif hərəkatda təmsil olunan digər partiyalarla artıq razılaşdırılıb. "Əvvəllər seçki komissiyalarının formalaşmasında hər partiya özünün maraqlarından çıxış edirdi. İşçi qrupunun hazırladığı sənəddə isə seçki komissiyalarının seçkidə bir faizdən yuxarı səs toplayan partiyalardan ibarət formalaşması təklif olunur. Liderlərin imzalayacağı sazişdə isə nəzərdə tutulacaq ki, hərəkatdakı partiyalardan hər hansı biri 1 faizlik baryeri aşa bilməsə, baryeri keçənlər seçki komissiyalarında, xüsusilə MSK-da onlara düşən yerlərdən baryeri aşmayan partiyaya və ya partiyalara yer versin", - sədr müavini qeyd edib.
Əliyevin sözlərinə görə, işçi qrupununhazırladığı təkliflər paketi hərəkatda təmsil olunan bütün partiyaların liderlərinə də təqdim olunacaq: "Bundan sonra seçki komissiyalarının tərkibinin formalaşması məsələsi ilə bağlı partiyaların rəhbərləri saziş imzalayacaqlar", - Əliyev bildirib.
İşçi qrupunun üzvü deyib ki, Seçki Məcəlləsinə təklif olunan dəyişikliklər arasında namizədlərin, müşahidəçilərin, blokların qeydə alınmasında prosedur qaydalarının sadələşdirilməsi ilə bağlı müddəalar da var. "Biz istəyirik ki, müşahidəçilərə daha geniş səlahiyyətlər verilsin, seçki hüququ pozulmuş insanların hüququ qısa zaman ərzində bərpa olunsun", - Əliyev deyib.
Məqalə müəllifi ilə əlaqə ünvanı: [email protected]
