Azərbaycan, Bakı, 3 avqust /Trend, müxbir T.Hacıyev/
Azərbaycanın müxalif Vətəndaş Həmrəyliyi Partiyası Parlament seçkilərində gənclərlə təmsil olunacaq. Bu barədə çərşənbə axşamı Trend-ə VHP-nin təşkilat şöbəsinin müdiri Samir Əsədli məlumat verib.
"Partiyanın irəli sürəcəyi namizədlərin sayı da müəyyənləşib. VHP qarşıdan gələn Parlament seçkilərində 72 dairə üzrə namizəd irəli sürəcək. 50 nəfərin dairəsi artıq müəyyənləşib. Namizədlərin böyük əksəriyyəti gənclərdən ibarətdir", - Əsədli əlavə edib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
VHP rəsmisinin sözlərinə görə, partiya seçkilər ərəfəsində digər müxalifət partiyaları ilə birgə fəaliyyət göstərəcək.
"Digər müxalifət partiyaları ilə danışıqlar aparılır. Ola bilər ki, seçki ərəfəsində namizədlərin birgə dəstəklənməsi ilə bağlı mərkəz yaradılsın", - Əsədli deyib.
Vətəndaş Həmrəyliyi Partiyası (VHP) 1992-ci ildə təsis edilib. 1992-ci il sentyabrın 26-da keçirilən birinci təsis qurultayında Sabir Rüstəmxanlı partiyanın sədri seçilib. VHP özündə 78 rayon təşkilatını və 30 minə yaxın üzvü birləşdirən partiyadır. Hazırda VHP bələdiyyələrdə 115, Parlamentdə isə 3 üzvlə təmsil olunur.
