...

Münaqişəli vəziyyətlərdə vasitəçiliyin uğuru tərəflərin güzəştlərə hazırlığından asılıdır – ekspert Marta Olkot

Siyasət Materials 12 Oktyabr 2010 14:26 (UTC +04:00)
Münaqişəli vəziyyətlərdə vasitəçiliyin uğuru tərəflərin güzəştlərə hazırlığından asılıdır – ekspert Marta Olkot

Azərbaycan, Bakı, 12 oktyabr /Trend, müxbir S.Süleymanov/

İki dövlət arasında münaqişəli vəziyyətlərdə üçüncü tərəfin vasitəçiliyi səmərəli ola bilməz. Bu yalnız münaqişə tərəflərinin özlərinin bir-birlərinə güzəştə getməyə hazır olduqları vaxt mümkündür. Qafqaz və Mərkəzi Asiya regionu üzrə amerikalı ekspert Marta Bril Olkot belə hesab edir.

"Problemin həllinə vasitəçinin köməyi ilə nail olmaq mümkün deyil, - Vaşinqtonda Karnegi Fondunun aparıcı eksperti olan Olkot Trend-ə bildirib. - Bu yalnız hər iki tərəfin öz aralarında körpü salmağa hazır olduqları vaxt mümkündür".

Onun sözlərinə görə, bu prinsip Cənubi Qafqaz regionundakı hər iki münaqişə - həm Dağlıq Qarabağ, həm də Gürcüstandakı münaqişə üçün tətbiq edilə bilər.

Ermənistan-Azərbaycan, Dağlıq Qarabağ münaqişəsinin nizamlanması üzrə sülh danışıqlarının vasitəçiləri tərkibində üç vasitəçi həmsədr ölkənin - Fransa, Rusiya və ABŞ-ın olduğu ATƏT-in Minsk qrupudur.

Gürcüstanda 2008-ci ildəki münaqişədən sonra vəziyyətin sabitləşdirilməsi üçün Cenevrə danışıqları aparılır. Görüşlərdə Abxaziya, Gürcüstan, Rusiya, ABŞ, Cənubi Osetiya, eləcə də Aİ, BMT və ATƏT nümayəndələri iştirak edirlər.

Olkot hesab edir ki, münaqişə edən ölkələrin xalqlarının yaxınlaşması siyasəti də uğur üçün şans yaradır.

Cənubi Qafqaz regionunda xalqların yaxınlaşması ideyası yalnız Dağlıq Qarabağ problemində tətbiq edilə bilər.

"Orada bu tədbirlər səmərəli ola bilər və xalq siyasətçilərin qərarlarına təsir göstərə bilər", - Olkot deyib.

Gürcüstandakı vəziyyətdə isə bu mümkün deyil. Çünki bu münaqişəyə üçüncü dövlət - Rusiya da qarışıb. Ekspert belə güman edir.

2008-ci il avqustun sonlarında Rusiya Gürcüstanın separatçı regionları olan Cənubi Osetiya və Abxaziyanın müstəqilliyini tanıyıb. Buna görə də Moskva ilə Tbilisi arasında diplomatik münasibətlər pozulub.

Münaqişə vəziyyətində olan ölkələrin xalqlarının yaxınlaşması təşəbbüsü ilə Avropa İttifaqı və Qazaxıstan Prezidenti Nursultan Nazarbayev çıxış edib.

Xəbər lenti

Xəbər lenti