Azərbaycan, Bakı, 13 dekabr /Trend, müxbir A.Axundov/
Türkiyə özünün qlobal Yaxın Şərq strategiyasını kifayət qədər müəyyən edib və bu strategiya İsrailin tutduğu mövqe ilə bir qədər ziddiyyət təşkil edəcək. Bu barədə Trend-ə telefonla Sankt-Peterburqun Müasir Yaxın Şərqin öyrənilməsi Mərkəzinin rəhbəri Qumer İsayev deyib.
"Türkiyənin real addımları, onun Yaxın Şərqdə təşəbbüsləri, ərəb ölkələri ilə münasibətlərinin yaxşılaşdırılması, Yaxın Şərq nizamlanmasına siyasi və diplomatik baxımdan cəlb edilməsi ondan xəbər verir ki, Türkiyədə Yaxın Şərqdə əvvəlki təsirə və əhəmiyyətə bu və ya digər şəkildə qayıdışa ciddi tendensiya var", - İsayev qeyd edib.
Yaxın keçmişədək hərbi-siyasi sahədə sıx əməkdaşlıq edən Türkiyə ilə İsrail arasında münasibətlər mayın 31-də İsrail hərbçilərinin Qəzzaya humanitar yük aparan "Azadlıq donanması"na hücumundan sonra kəskin pisləşib. Doqquz Türkiyə vətəndaşının həlak olduğu bu hücumun ardından Ankara Təl-Əvivlə münasibətlərə yenidən baxacağını bəyan edib.
İsayevin sözlərinə görə, Türkiyə kifayət qədər bacarıqlı, təcrübəli diplomatdır və İsraillə birmənalı şəkildə münasibətləri korlamaq əlaqələri "soyuq müharibə" vəziyyətinə gətirir və yəqin ki, Türkiyə bu məsələdə maraqlı deyil.
