Azərbaycan, Bakı, 3 oktyabr /Trend, müxbir A.Tağıyeva/
Türkiyə hakimiyyəti terrorizmlə mübarizənin yeni yolunu nəzərdən keçirir. Yeni üsul ölkədə terror aktları ilə əlaqədar Kürd Fəhlə Partiyası (PKK) üzvləri barədə hər hansı məlumatı təqdim edənlərə pul mükafatı verilməsini nəzərdə tutur. Trend-in məlumatına görə, xəbəri "Radikal" qəzeti yazıb.
Müvafiq qərar terrorizmlə mübarizənin inkişafı çərçivəsində Türkiyə Daxili İşlər Nazirliyi tərəfindən qəbul edilib. Nazirlikdən verilən məlumatda bildirilir ki, bu yenilik və mükafatlandırmanın miqdarı terrorizmlə mübarizə barəsində qanunda əksini tapacaq.
Türkiyə son zamanlar terrorizmlə aktiv mübarizəyə keçib.
Türkiyənin Hərbi Hava Qüvvələri (HHQ) İraqın şimalındakı kürd separatçılarının mövqelərinə zərbələr endirir.
Türkiyə HHQ avqustun 17-si axşam yaraqlıların Türkiyənin şimal-şərqində törətdikləri hücumdan sonra aviazərbələr endirib. Həmin hücum nəticəsində 9 türk hərbiçisi öldürülmüşdü. Bu, Türkiyənin bir ildən artıq müddət ərzində İraqın şimalına endirdiyi ilk zərbələrdir.
Türkiyə iə PKK arasında münaqişə 25 ildən artıqdır davam edir. Bu münaqişə 40 mindən artıq insanın həyatına son qoyub. PKK BMT, eləcə də Ankaranın tamhüquqlu üzv kimi daxil olmağa çalışdığı Aİ tərəfindən terror təşkilatı kimi tanınıb.
Bundan əvvəl PKK yaraqlıları Türkiyə hakimiyyətini çoxillik kürd probleminin həlli ilə bağlı konkret addımlar atılmayacağı təqdirdə silahlı qarşıdurmaların fəallaşacağı ilə hədələyib.