...

Azərbaycanın millət vəkilləri Brüsselə səfər edəcəklər

Siyasət Materials 21 Yanvar 2012 12:56 (UTC +04:00)
Yanvarın 22-dən 31-dək Brüsseldə Avronest Parlament Assambleyasının iclasları keçiriləcək.
Azərbaycanın millət vəkilləri Brüsselə səfər edəcəklər

Azərbaycan, Bakı, 21 yanvar /Trend, müxbir K.Zərbalıyeva/

Yanvarın 22-dən 31-dək Brüsseldə Avronest Parlament Assambleyasının iclasları keçiriləcək.

Trend-in şənbə günü Milli Məclisin rəsmi saytına istinadən verdiyi məlumata görə, tədbirlərdə ölkəmizi Avronest PA-da Azərbaycan milli nümayəndə heyətinin başçısı Elxan Süleymanovun rəhbərlik etdiyi deputat qrupu təmsil edəcək.

Nümayəndə heyətinin tərkibinə Milli Məclisin komitə sədri Əli Hüseynli, deputatlar Rövşən Rzayev, Asim Mollazadə, Fuad Muradov, Rasim Musabəyov, Sevinc Hüseynova və Azər Kərimli daxildirlər.

Öncə qurumun İqtisadi inteqrasiya, hüquqi yaxınlaşma və Avropa İttifaqı siyasətləri ilə uyğunluq komitəsinin iclası olacaq. İclasda "Avropa İttifaqı və Şərq Tərəfdaşlığı ölkələri arasında ticarət razılaşması, azad ticarət zonaları və bu sahədə Aİ-nin yardımı" mövzusunda hesabat dinləniləcək. Aİ ilə tərəfdaş dövlətlərin iqtisadiyyat sahəsindəki qanunvericiliyinin uyğunlaşdırılması məsələsinə baxılacaq. Nəqliyyat və mülki aviasiya sahələrində əməkdaşlıq barədə fikir mübadiləsi aparılacaq.

Sonra Prosedur Qaydaları üzrə İşçi Qrupunun iclasında tərəflərin müvafiq təklifləri nəzərdən keçiriləcək.

Avronest PA-nın Siyasi məsələlər, insan hüquqları və demokratiya komitəsində "Şərq Tərəfdaşlığı və Avropa İttifaqı ölkələrində demokratiyanın gələcəyi, həmçinin azad və müstəqil media ilə bağlı çağırışlar" mövzusu üzrə dinləmələr keçiriləcək. Komitədə Milli Məclis üzvlərindən mövzu üzrə hesabatın həmməruzəçisi Əli Hüseynli çıxış edəcək.

Qurumun Enerji təhlükəsizliyi komitəsində isə Avropa İttifaqı ilə Şərq Tərəfdaşlığı ölkələrində enerji təhlükəsizliyi məsələsi gündəmdə olacaq. İclasda deputatımız Rasim Musabəyov həmməruzəçi qismində hazırladığı enerjinin bərpası, səmərəliliyi və infrastrukturu barədə hesabatı təqdim edəcək.

Avronest Parlament Assambleyasının bütün tədbirlərində deputatlarımız yaxından iştirak edəcək, müzakirəyə çıxarılmış məsələlərə münasibət bildirəcəklər.

Xəbər lenti

Xəbər lenti