Azərbaycan, Bakı, 5 aprel /Trend, müxbir S.Ağayeva/
Azərbaycanın xarici işlər naziri Elmar Məmmədyarov Beynəlxalq Təhlükəsizliyə Dəstək qüvvələrinə (International Security Assistance Force - ISAF) töhfə verən ölkələrin XİN rəhbərlərinin iclasına dəvət olunub.
İclas aprelin 19-da Brüsseldə keçiriləcək. Bu barədə cümə axşamı Trend-ə NATO-dakı mənbə bildirib.
NATO-nun başçılıq etdiyi ISAF 2001-ci ildən Əfqanıstan ərazisində fəaliyyət göstərən beynəlxalq hərbi kontingentdir.
İclasda ISAF proqramlarının reallaşdırılması perspektivlərinin müzakirə edilməsi planlaşdırılır.
Aprelin 18-19-da NATO-nun mənzil-qərargahında NATO ölkələrinin XİN rəhbərlərinin və müdafiə nazirlərinin iclası keçiriləcək.