"Şərq Tərəfdaşlığı" sammitinin bəyannaməsi – büdrəmək üçün qəfil daş
Elmira Tariverdiyeva - Trend:
Avropa İttifaqı (Aİ) "Şərq Tərəfdaşlığı" layihəsinin iştirakçılarının dünən Riqada başlayan sammiti dəqiq göstərdi ki, təəssüf, Aİ iştirakçı ölkələri yeni problemə müxtəlif cür yanaşırlar.
Sammitin başlamasından bir neçə saat sonra məlum oldu ki, layihənin iki iştirakçısı - Belarus və Ermənistan Rusiyanın Krımı "qeyri-qanuni" ilhaqı bəndinə görə, yekun bəyannamədə razılığa gəlməkdən imtina edib. Bəyannamə bu gün qəbul edilib.
Belarus Moskvaya tərəfdaş ölkədir və "Böyük qardaş" ilə iqtisadi və siyasi sahədə dostluq etdiyini başa düşərək onu hər cəhətdən dəstəkləyir - bu, Avropaya can atmayan yaxın qonşu üçün düzgün qərardır.
Ermənistan isə həmişə Rusiyanın sədəqəsinə yaşayıb. Bu sədəqəni də Moskvanın Cənubi Qafqazda forpost rolunu oynamaqla alır. Bundan əlavə, işğalçı ölkənin ilhaq haqqında bəyannamə imzalaması gülünc olardı. Ermənistanın özü 20 ildən çoxdur ki, Azərbaycan torpaqlarını işğal altında saxlayır. "İlhaq" sözünün işləndiyi bəyannaməni imzalamaqla Ermənistan işğalçı siyasətində məntiqsiz davranardı.
"Şərq Tərəfdaşlığı" proqramının iştirakçılarından birinin digər iştirakçı ölkəni işğal etmə məsələsinə laqeyd yanaşıb, yalnız Ukraynanın ərazi problemlərinə diqqət ayıran Aİ-ni başa düşmək isə mümkün deyil.
Ümumi regionda təhlükəsizliyi pozan və Cənubi Qafqazda daha bir qaynar nöqtəyə çevrilmə təhlükəsi ola bilən Dağlıq Qarabağ münaqişəsi həmişə dünyanın diqqət mərkəzində olmalıdır.
Ermənistanın işğalçı fəaliyyəti Avropa tərəfdaşları tərəfindən cavabsız qalmamalıdır. Yalnız birgə səylər və işğalçı rejimə daim təzyiq etməklə regionun bütün ölkələrinə və hətta kontinentə təsir göstərəcək dəhşətli faciənin qarşısını almaq olar.
Yalnız belə olduğu təqdirdə, "Şərq Tərəfdaşlığı" proqramının həqiqətən region əhalisinin həyat səviyyəsinin yaxşılaşdırılmasına yönəldiyini demək olar.
