Bakı. Trend:
Dekabrın 14-də Azərbaycanın Argentinadakı səfiri Rəşad Aslanov bu ölkənin ECO Medios AM 1220 radiosunda jurnalist Pablo Qaleanonun təqdimatında yayımlanan və dinləyiciləri müxtəlif ölkələr bağlı məlumatlandıran “Tendensiyalar” verilişinin qonağı olub.
Xarici İşlər Nazirliyinin mətbuat xidmətindən Trend-ə verilən məlumata görə, canlı yayımlanan veriliş zamanı R.Aslanov Azərbaycan, onun tarixi, müstəqilliyin bərpasından sonra ölkəmizin müxtəlif sahələrdə əldə etdiyi uğurlar, regiondakı rolu, təşəbbüskarı olduğu irimiqyaslı strateji layihələr barədə ətraflı danışıb. R.Aslanov Ermənistan-Azərbaycan münaqişəsi, onun tarixi, münaqişə ilə bağlı BMT və digər beynəlxalq təşkilatlar tərəfindən qəbul olunmuş və Azərbaycanın haqlı mövqeyini dəstəkləyən sənədlər barədə ətraflı məlumat verib.
Verilişin yayımlandığı müddətdə R.Aslanov aparıcı P.Qaleanonun ölkəmizlə bağlı müxtəlif sahələri əhatə edən suallarını cavablandırıb, Azərbaycan-Argentina münasibətləri, ölkəmizin turizm imkanları, zəngin mədəniyyəti, Azərbaycanın multikulturalizm dəyərlərinin təşviqi sahəsində qazandığı nailiyyətlərlə bağlı dinləyiciləri məlumatlandırıb.
Trend-in ən mühüm və maraqlı xəbərlərini "Telegram"da izləyin
