Bakı. Trend:
Fevralın 7-də Azərbaycanda keçirilən prezident seçkiləri beynəlxalq təşkilatlar tərəfindən yüksək qiymətləndirilir.
Trend-in xəbərinə görə, bunu bu gün Mərkəzi Seçki Komissiyasının iclasında MSK sədri Məzahir Pənahov deyib.
O qeyd edib ki, prezident seçkilərini müşahidə edən müxtəlif qurumlarından Mərkəzi Seçki Komissiyasına məktublar daxil olur.
“Həmin qurumlar seçkilərin yüksək səviyyədə keçdiyini bildirirlər”, - deyə o qeyd edib.
O əlavə edib ki, seçkilərin şəffaf və ədalətli keçirilməsi üçün nə addımlar atmaq mümkün olubsa atılıb.
Qeyd edək ki, fevralın 7-də Azərbaycanda Prezident seçkiləri baş tutub. İlham Əliyev seçkilərdə iştirak etmiş seçicilərin 92,12 faizinin səsini qazanaraq yenidən Azərbaycan Respublikasının Prezidenti seçilib. Növbədənkənar prezident seçkilərində seçici fəallığı 76, 43 faiz olub.