Milli Məclisin yaz sessiyasında iqtisadiyyata təkan verə biləcək bir sıra qanun layihələri qəbul olunacaq. Bu barədə Trend ə parlamentin iqtisadi siyasət daimi komissiyasından bildiriblər.
Hazırda komissiyanın işçi qruppu müvafiq instansiyalarla birlikdə "Rəqabət haqqında" qanun layihəsi üzərində iş aparır. Sənədin məqsədi iqtisadi sahədə münaibətləri tənzimləməklə yanaşı, müxtəlif sahələr üzrə inhisarçılığın aradan qaldırılmasını təmin etməkdir.
Adıçəkilən komissiyadan onu da bildiriblər ki, "İnvestisiya haqqında" qanun layihəsinin ayrı-ayrı maddələri yenidən işlənəcək. Sənəddəki bəzi məsələlər beynəlxalq qurumlarla razılaşdırılmalıdır. Qanun ölkə ərazisində investisiya fəaliyyətinin iqtisadi və hüquqi əsaslarını müəyyən etməklə yanaşı, sərmayələrin ölkə iqtisadiyyatına cəlb edilməsini təmin edəcək. Bu qanun layihəsi də parlamentin yaz sessiyasında millət vəkillərinin müzakirəsinə çıxarılacaq.