Bir qrup millət vəkilindən ibarət "Qarabağ komissiyası" yaratmaq təşəbbüsünü parlamentin yaz sessiyasında həyata keçirəcəyik. Bu barədə Trend ə Böyük Quruluş Partiyasının sədri, millət vəkili Fazil Qəzənfəroğlu bildirib.
F.Qəzənfəroğlu bildirib ki, bu məqsədlə millət vəkilləri arasında imzatoplama kampaniyası da aparılıb. Artıq komissiyanın yaradılması ilə bağlı sənədə 18 millət vəkili imza atıb: "Məqsədimiz Dağlıq Qarabağ probleminin həlli istiqamətində komissiya tərəfindən müəyyən təkliflər paketini hazırlamaq və bu məsələni daim diqqət mərkəzində saxlamaqdan ötrü fəaliyyət göstərməkdir".
Millət vəkili onu da bildirib ki, əvvəlcə parlamentdə Qarabağ fraksiyası yaratmaq təşəbbüsü ilə çıxış etmişdilər. Lakin bu alınmadığından fraksiyanı komissiya ilə əvəzlədilər. F.Qəzənfəroğlu onu da bildirib ki, sənədi imzalayan 18 deputat arasında müxalifət və iqtidaryönlü partiyaların nümayəndələri də var.
