Fevralın 19- 20-də Azərbaycan Elmi-Tədqiqat Baytarlıq İnstitutunun direktoru İlham Əzimov və Respublika Baytarlıq Preparatlarına Nəzarət İnstitutunun direktoru Çingiz Əhmədov Gəncəbasar bölgəsində olub. Trend in bölgə müxbiri bildirir ki, Gəncə, Samux, Xanlar rayonlarında bir sıra görüşlər keçirən qonaqların səfərinin məqsədi H 5 N 1 virusunun bölgədə törədə biləcəyi fəsadlara qarşı aparılan tədbirlərlə tanış olmaq idi. Mütəxəssislər özləri ilə mübarizə üçün lazım olan bəzi ləvazimatları da gətirib. Belə ki, 10 dəst paltar, 5 çiləyici aparat Gəncə, 5 dəst paltar, 3 çiləyici aparat isə Xanlar və Samux rayon Baytarlıq İdarələrinə verilib. Məlumat üçün bildirək ki, bundan qabaq Gəncə Baytarlıq idarəsində 15 paltar və 1 çiləyici var idi.
Mütəxəssislər yerli jurnalistlərlə söhbətində regionlar arasında Gəncədə işlərin nisbətən normal qaydada aparıldığını vurğulayıb. Onların fikrincə, əgər quşların kütləvi şəkildə qırılması varsa demək bu artıq sos siqnalı olmalıdır. Çünki Azərbaycanda quş qripi virusunun olması faktı bunu deməyə əsas verir. Bundan sonra alimlər yerlərdə baytarlıq mütəxəssislərinin çatışmamazlığından şikayətlənib. Onların dediyinə görə, əvvəllər Azərbaycan Kənd Təsərrüfatı Akademiyasında hər il təxminən 60-70 tələbə baytar kimi hazırlanırdı. İndi isə il ərzində bu rəqəm 8-10 nəfəri keçmir. Bu da belə ekstremal vəziyyətlərdə öz sözünü deyir.