Dünya Azərbaycanlıları Əlaqələndirmə Şurası İngiltərənin paytaxtı London şəhərində yerləşən London Universitetində Qarabağ münaqişəsinə dair tədbir keçirib. Bu barədə Trend ə Dünya Azərbaycanlıları Əlaqələndirmə Şurasından məlumat verilib. Tədbirdə azərbaycanlı və ingilis tələbələrlə yanaşı, müxtəlif millətlərin nümayəndələri, o cümlədən London Universitetində təhsil alan erməni tələbələr iştirak ediblər.
Dünya Azərbaycanlıları Əlaqələndirmə Şurası İdarə Heyətinin sədr müavini professor Qulamrza Səbri Təbrizi ermənilərin Qarabağda törətdiyi cinayətlərdən danışıb, onların yalanlarını ifşa edən konkret faktlar göstərib. Tədbirdə əvvəlcə ermənilər, daha sonra azərbaycanlılar film nümayiş etdiriblər. Ermənilərin təqdim etdiyi filmdə tarixən azərbaycanlılarla ermənilər arasında olmuş dostluq münasibətləri göstərilib və işğal etdikləri Qarabağ torpaqlarında apardıqları təmir-bərpa işləri nümayiş etdirilib. Tədbirə qatılan azərbaycanlılar isə buna qəti etiraz edib və bu cür faktların ermənilərin Qarabağın artıq onlara məxsus olması obrazını yaratmaq və dünya ictimaiyyətini buna inandırmaq siyasəti olduğunu bəyan ediblər. Daha sonra həmyerlilərimizin nümayiş etdirdiyi sənədli filmdə ermənilərin Qarabağda həyata keçirdiyi vəhşiliklərə, Xocalı soyqırımına və işğal altında olan torpaqlarımıza dair kadrlar göstərilib. Filmə aid erməni tərəfinin iradlarını cavablandıran Qulamrza Səbri Təbrizi və digər azərbaycanlılar ermənilərin işğalçılıq siyasətini və Qarabağda törətdikləri terror aktlarını sübuta yetirən faktlarla çıxış ediblər.
