Azərbaycan Yaşıllar Partiyasının sədri Elmar Qafarov eyniadlı partiyanı yaratdığını bəyan edən Mais Güləliyevi siyasi etikasızlıq göstərməkdə ittiham edib. Bu barədə fikirlərini Trend ə Elmar Qafarov açıqlayıb.
O bildirib ki, 1989-cu ildə Azərbaycanda Yaşıllar Hərəkatı başlayıb, 1993-cü ildə hərəkat siyasi partiyaya çevrilib və sədri keçmiş ekologiya naziri Arif Mansurov olub. O, vəfat etdikdən sonra 2002-ci ildən həmin partiyaya Elmar Qafarov və mərhum sədrin həyat yoldaşı Cəmilə Mansurova rəhbərlik ediblər. Elmar Qafarovun sözlərinə görə, Yaşıllar Partiyasının mövcud olması Azərbaycan ictimaiyyətinə bəllidir və bu partiya müxalifət düşərgəsində Demokratik Blokun üzvü, "Bizim Azərbaycan" blokunun həmtəsisçisi olub. Hazırda partiya "Bizim Azərbaycan" blokunda təmsil olunur.
Ötən gün isə Mais Güləliyevin rəhbərliyi ilə bir neçə şəxs mətbuat konfransı keçirərək Yaşıllar Partiyası yaratdıqlarını bəyan ediblər. Elmar Qafarov bildirib ki, Mais Güləliyev Yaşıllar Partiyasının artıq mövcud olduğunu bilir və bir neçə dəfə bu partiyanın tədbirlərndə iştirak edib: "İndi onun bu adda partiya yaratması, bizim adımızı mənimsəməsi başadüşülən deyil. İstənilən halda bu, siyasi etikaya ziddir"-deyə E.Qafarov bildirib.
Yaşıllar Partiyasının təmsil olunduğu "Bzim Azərbaycan" bloku da bu məsələ ilə bağlı etiraz bəyanatı verib. Blokun sədri Vüqar Bəyturan bildirib ki, M.Güləliyevin artıq mövcud olan bir partiyanın adını mənimsəyərək eyniadlı partiya yaratmaq cəhdini pisləyir.
