...

Eldar Namazov: "Moskva forumunun nəticəsi kimi ayrı-ayrı ölkələrdəki problemlərlə bağlı Avropa strukturlarında qərarlar veriləcək"

Siyasət Materials 21 Oktyabr 2006 14:08 (UTC +04:00)

Avropa Şurasının və Avropa Şurası Parlament Assambleyasının təşkilatçılığı ilə Moskvada keçirilən "Demokratiyanın gələcəyi uğrunda" beynəlxalq forumda aparılan müzakirələrin nəticəsi kimi bir sıra ölkələrdəki problemlərlə bağlı Avropa strukturlarında konkret qərarlar çıxarıla bilər. Bu barədə Trend ə həmin Forumda iştirak etmiş Azərbaycan Naminə Alyansın prezidenti, müxalifəti təmsil edən "Yeni Siyasət" blokunun həmsədri Eldar Namazov məlumat verib.

O qeyd edib ki, bu forumda Avropa Şurası, AŞPA və onun komitələrinin rəhbərləri, bir çox ölkələrin nümayəndə heyətləri, parlament spikerləri, siyasi partiyaların sədrləri iştiak edib. E.Namazovun sözlərinə görə, tədbirdə siyasi partiyaların, vətəndaş cəmiyyəti qurucularının fəaliyyətini tənzimləyən məcəllənin hazırlanması təklifi irəli sürülüb və dəstəklənib. Sonda qərara alınıb ki, növbəti forumlarda daha geniş müzakirələr aparılsın. E.Namazovun sözlərinə görə, forumun yekun nəticəsi kimi orada qaldırılan məsələlər əsasında Avropa Şurasının strukturlarında, AŞPA-da ayrı-ayrı ölkələrdəki konkret problemlərlə əlaqədar konkret qərar və ya tövsiyələrin verilməsi nəzərdə tutulur.

E.Namazov bildirib ki, forumdakı müzakirələrdən başqa, o, Avropa strukturlarının nümayəndələri ilə çoxsaylı ikitərəfli görüşlər də keçirib. Görüşlərdə Azərbaycandakı ictimai-siyasi durum, medianın problemləri və digər məsələlər barədə danışılıb.

Qeyd edək ki, sözügedən forum Avropa Şurası və AŞPA-nın 2005-ci ildə keçirilən Varşava sammitində təsis olunub. Birinci forum Polşada olub, bu il ikinci forum Moskvada keçirilib. Gələn il növbəti forum San-Marinoda olacaq.

Xəbər lenti

Xəbər lenti