Naxçıvan şəhərində elektrik enerjisindən istifadə edən abunəçilərin tam əksəriyyəti ödənişə cəlb edilib. Trend in Naxçıvan Bürosu bu barədə Naxçıvan Şəhər Elektrik Şəbəkəsinə istinadən məlumat verir.
Adıçəkilən təşkilatdan alınan məlumata görə, ödəmədən yayınmaya nadir hallarda rast gəlinsə də, müvafiq tədbirlər görülüb. Bütövlükdə, yanvar-noyabr ayları ərzində şəhər əhalisindən 1 mln 849 min manat həcmində vəsait toplanılıb. Bu isə alınan enerjinin 42,42%-ni təşkil edib. Ötən ilin müvafiq dövrü ilə müqayisədə isə 13 % artım olub.
Cari ilin 11 ayında 26,5 mln kv/saat az enerji istifadə olunub. Hazırda regionda elektrik enerjisinin verilməsində fasilələrə rast gəlinmir. Naxçıvan Şəhər Elektrik şəbəkəsindən bildiriblər ki, israfçılıq hallarının qarşısının alınmasını sayğacların quraşdırılması ilə yanaşı maarifləndirmə tədbirlərin aparılması, eləcə də mütəmadi təşkil olunan reydlər təmin edib ki, bu da şəhər əhalisinin elektrir enerjisi ilə fasiləsiz təminatına tam şəkildə imkan verir.
