Azərbaycan hökuməti Fransanın "Lafarge" sement istehsalçısına birtərəfli formada imzalanmış "Niyyət" protokolu göndərib. İqtisadi inkişaf naziri Heydər Babayev Trend ə bildirib ki, protokol Azərbaycan investisiya şirkəti tərəfindən hazırlanıb.
H.Babayev bildirib: "Biz indi "Lafarge"in şərhlərini gözləyirik. Bu şirkətlə birgə Azərbaycanda "sıfırdan" yeni sement zavodunun tikintisini planlaşdırırıq.
İnvestisiya şirkətinin bu layihədə maksimum iştirakı 20-25 faiz təşkil edəcək, qalan hissə "Lafarge" şirkətnin hesabına həyata keçiriləcək. İnvestorun iştirakı dövlət təminatsız olacaq.
1-1,25 mln. ton gücündə sement zavodu layihəsinin dəyəri 110-120 mln. dollar dəyərində qiymətləndirilir. Zavodun yerləşdiyi yer texniki-iqtisadi əsaslındırmadan asılı olacaq.
Nazir qeyd edib: "İnvestor infrastruktura, dəmir yoluna, avtomobil yollarına baxmalıdır, həm də zavodun yerləşdiyi yer xammaldan çox aralı olmamalıdır".