Naxçıvan MR İqtisadi İnkişaf Nazirliyində ötən ilin nəticələri müzakirə edilib. Bu barədə Trend in Naxçıvan Bürosu xəbər verir.
Kollegiya iclasında Naxçıvan MR iqtisadi inkişaf naziri Famil Seyidov çıxış edərək 2006-cı ildə 881 yeni iş yerinin açıldığını deyib. Nazir regionda fəaliyyət göstərən müəssisələrin fəaliyyətinin genişləndirilməsindən danışıb, sahibkarlıq subyektlərinin fəaliyyətinə toxunub, əldə olunmuş nailiyyətləri rəqəm və faktlarla təhlil edib.
Famil Seyidov nöqsanlara da toxunub. Onun sözlərinə görə, 1996-2000-ci illərdə güzəştli şərtlərlə özəlləşdirilmiş kiçik müəssisə və obyektlərin müddəti ötmüş borclarının ödənilməsi tam təmin olunmayıb, bəzi istehsal müəssisələri Muxtar Respublika əhalisinin tələbatından artıq məhsul istiehsal etmək gücünə malik olduğu halda buna səy göstərməyib. Nazir çıxışında qeyd olunan nöqsanların aradan qaldırılması, müəssisələrin tam gücü ilə işləməsi, istehsal olunan məhsulun satışının lazımınca təşkil olunması istiqamətində tapşırıqlar verib. Kollegiya iclasının sonunda 2007-ci ildə qarşıda duran vəzifələrin icrası ilə bağlı qərar layihəsi qəbul olunub.