Müxalifətyönlü Müsavat Partiyası yanvarın 28-də keçirəcəyi yürüş- mitinqə hazırlığı başa çatdırıb. Bu barədə Trend ə Müsavat Partiyasının mətbuat xidmətindən məlumat verilib.
Bildirilib ki, aksiya siyasi xarakter daşımadığı üçün yalnız sosial şüarlar səsləndiriləcək, Tarif Şurasının qərarının icrasını dayandırılması və əhalinin sosial müdafiəsi üçün tədbirlərin gücləndirilməsi tələb olunucuq.
Müsavat partiyasının yürüş-mitinqi yanvarın 28-də metronun "Həzi Aslanov" stansiyası yaxınlığından Ukrayna meydanınadək keçiriləcək. Aksiya saat 16-da başlayacaq və 2 saat davam edəcək. Bu, 2005-ci ilin 26 noyabr mitinqindən sonra müxalifətin ilk aksiyasıdır ki, onun keçirilməsinə Bakı Şəhər İcra Hakimiyyəti razılıq verib.
Qeyd edək ki, müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.
