Azərbaycan, Bakı, 12 fevral / Trend , müxbir S.İlhamqızı/ Söz Azadlığı Müdafiə Komitəsi Avropa Şurası Parlament Assambleyasının Azərbaycan üzrə həmməruzəçisi Yevgeniya Jivkovaya müraciət ünvanlayacaq. Bu barədə çərşənbə axşamı Trend ə Müdafiə Komitəsindən məlumat verilib.
Jivkova BBS-yə müsahibəsində bildirib ki, Azərabycanda mətbuat sahəsində əsas problem jurnalistlərin siyasi qüvvələrə yaxın olmasıdır: "Mətbuat işçiləri siyasi qüvvələrlə öz aralarında məsafə saxlamalıdırlar. Mənə deyilən fikirlər arasında zidiyyət olduğundan, Azərbaycanda jurnalistlərin azadlığa buraxılması tələbini səsləndirməyə tələsmək istəmirəm"-deyə həmməruzəçi müsahibəsində bildirib.
Söz Azadlığını Müdafiə Komitəsinin işçi qrupunun bu gün keçirilən toplantısında qərara alınıb ki, həmməruzəçinin Azərbaycanda söz azadlığının vəziyyətinə, jurnalistlərin həbsdə olmasına dair mövqeyini dəqiq öyrənmək üçün ona müraciət edilsin.
Müraciətdə Jivkovanın ziddiyyətli fikirlərinin Azərbaycanda təşviş yaratdığı bildiriləcək, eyni zamanda, onun nəyə əsaslanaraq jurnalistlərlə bağlı fikir yürütməsi soruşulacaq, ondan öz mövqeyini açıq bildirməsi tələb ediləcək.
Söz Azadlığını Müdafiə Komitəsi, həmçinin, qərara alıb ki, "Azadlıq" qəzetinin baş redaktoru Qənimət Zahidin məhkəmə prosesi ilə bağlı beynəlxalq təşkilatlara bəyanat ünvanlasın.
Azərbaycanda populyar nəşrlərdən olan "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Sakit Zahidov, "Gündəlik Azərbaycan"-"Realnıy Azerbaydjan" qəzetlərinin baş redaktoru Eynulla Fətullayev həbsdədirlər.
Söz Azadlığının Müdafiə Komitəsinə müstəqil qəzetilərin rəhbərləri, hüquq müdafiəçiləri daxildir.
Müəlliflə əlaqə saxlamaq üçün elektron ünvan - [email protected]
