Azərbaycan,Bakı,15fevral/ Trend , müxbir C.Babayeva/Azərbaycanın bəzi regionlarında son vaxtlar yeniyetmələrin intihar hallarının artmasının əsas səbəbi sosial-iqtisadi vəziyyətin ağırlığına görə valideynlərin öz uşaqlarına biganəliyidir. Bu barədə Trend ə cümə günü Uşaqların Müdafiəsi Liqasının sədri Yusif Nəbiyev bildirib.
Ötən il Azərbaycanda 16 uşaq intihar edib. Bu ilin əvvəlindən bəri 4 uşaq özünə qəsd edib.
Nəbiyevin sözlərinə görə, Azərbaycanın bəzi regionlarında mövcud iqtisadi böhran böyüklərlə yanaşı, uşaqlara da ciddi təsir göstərir.
"İqtisadi böhran nəticəsində, valideynlər uşaqların tərbiyəsinə vaxt ayıra bilmir. Həmyaşıdları kimi geyinmək istəyən uşaq valideynlərinin bu şəraiti ona vermək imkanında olmadığını anlayanda, diskriminasiya olunduğunu hiss edir və təzyiqlərə tab gətirməyərək, özünə sui-qəsd edir",- deyə Nəbiyev bildirib.
Psixoloq Azad İsazadənin Trend ə bildidiyinə görə, yeniyetmələrin intihar hallarının artmasının bir sıra səbəbləri var.
"Yeniyetmələr intihar edənlər arasında ən riskli qrupa aiddir. Maksimalist, psixoloji yetişməyən yeniyetmələr üçün hamıya adi gələn problem dözülməz olur. Onlar sarsıntılardan yeganə çıxış yolunu intiharda görürlər",- deyə İsazadə bildirib.