Azərbaycan, Lənkəran, 29 fevral / Trend , müxbir P.Əliyeva/ Lənkəran rayonunda heroin istifadəçilərinin sayı artıb. "Narkoloji Dispanserdə qeydiyyatda olan 1044 narkomandan 758-i heroin istifasəçiləridir" cümə günü Trend "a Lənkəran şəhər Narkoloji Dispanserinin baş həkimi Vüqar Əliyev bildirib.
Dispanserdə qeydiyyatda olan 1044 narkomandan 7-sı qadındır. Hazırda 6 xəstə stasionar müalicəyə cəlb olunub. Ümumilikdə 380 narkoman profilaktik qeydiyyatdadır. Narkomanların 360-ı 18-29 yaş, 495-i 30-39 yaş, 189-u 40-59 yaş qrupunda olanlardır.
Əliyev deyib ki, yanvar-fevral aylarında rayonda 9 narkoman qeydə alınıb ki, bu da ötən ilin müvafiq dövrü ilə müqayisədə 4 xəstə azdır. Onun sözlərinə görə, xəstələrin 90 faizi asılılıqdan yaxa qurtarmaq istədiklərini bildirirlər. Baş həkim narkomanların sayının hazırkı statistikadan çox olduğunu da istisna etməyib.
Lənkəran paytaxt Bakıdan 270 kilometr cənubda yerləşir.