Azzrbaycan, Bakı, 06 may / Trend , müxbir C.Babayeva/ Mayın 21-də Gürcüstan parlamentinə keçiriləcək seçkilərlə əlaqədar azərbaycanlı namizədlər seçki kampaniyalarına maneələrin yaradılmasından şikayətlənirlər.
"Azərbaycanlı namizədlərin seçicilərlə görüşlərinin qarşısı alınır, onlar hədələnir",- deyə Trend -a "Gürcüstan naminə" partiyasının sədri, Gürcüstanın "Xristian-Demokrat Alyans" partiyasının seçki siyahısında 10-cu yerdə deputatlığa namizədliyi irəli sürülmüş Fazil Əliyev bildirib.
Gürcüstan parlmentinə 14 azərbaycanlının namizədliyi irəli sürülüb.
Parlament seçkilərində Gürcüstanın 62 siyasi partiyası iştirak edəcək.
Əliyevin sözlərinə görə, Gürcüstan hakimiyyəti parlamentdə iki nəfərdən artıq azərbaycanlının təmsil olunmamasına çalışır. Onun fikrincə, azərbaycanlıların Gürcüstan cəmiyyətinə inteqrasiyası genişləndiyindən, Gürcüstan hakimiyyəti məqsədinə nail ola bilməyəcək.
"İlk dəfədir ki, Gürcüstanın parlament seçkilərində bu qədər azərbaycanlı namizəd iştirak edir",- deyə o qeyd edib.
Azərbaycanın Gürcüstandakı səfirliyinin nümayəndələri ölkənin Mərkəzi Seçki Komissiyasında keçirdiyi görüşdə azərbaycanlıların parlament seçkilərində iştirakına yaradılan maneələrlə bağlı narazılığını bildiriblər.
Çərşənbə axşamı telefonla səfirliyin mətbuat katibi Elxan Poluxovun Trend -a bildirdiyinə görə, azərbaycanlıların seçki siyahıları gürcü dilində nəşr olunub.
"Seçkilər haqqında qanunvericiliyə əsasən, milli azlıqların seçki siyahıları onların doğma dillərində çap olunmalıdır" - deyə Poluxov əlavə edib.
Azərbaycanlı diplomat qeyd edib ki, Gürcüstan MSK-ya seçki kampaniyası materiallarının Azərbaycan dilinə tərcüməsinin keyfiyyəti ilə bağlı iradlar bildirilib.
Poluxov bildirib ki, Gürcüstan MSK səfirliyin iradlarını qəbul edib.
Məqalə müəllifi ilə əlaqə saxlamaq üçün ünvan - trend
