Azərbaycan, Bakı,13 may / Trend , müxbir T.Abbasov/ Məhkəmə "Azadlıq" qəzetinin həbsdə olan baş redaktoruna bəraət vermədi.
Çərşənbə axşamı Bakı Apellyasiya Məhkəməsi baş redaktor Qənimət Zahid və onunla birgə həbs olunmuş Vüsal Həsənovun apellyasiya şikayətini təmin etməyib və birinci instansiya məhkəməsinin hökmünü qüvvədə saxlayıb.
Zahid Cinayət Məcəlləsinin qəsdən sağlamlığa az ağır zərər vurma və xuliqanlıq cinayətlərində şübhəli bilinərək Bakının Yasamal rayon məhkəməsinin hökmü ilə 4 il azadlıqdan məhrum edilib. Digər təqsirləndirilən Vüsal Həsənova 1 il 6 ay iş verilib.
Baş redaktorun vəkilləri Ali Məhkəməyə kassasiya şikayəti verəcək.
Baş redaktorun həbsinə noyabrın 7-si saat 16 radələrində "Azadlıq" qəzeti redaksiyasının yerləşdiyi "Azərbaycan" nəşriyyatının binası qarşısında baş vermiş insident səbəb olub. Sevgiladə Quliyeva və Vüsal Həsənov adlı iki nəfərlə Zahid arasında yaranan mübahisə əlbəyaxa dava ilə nəticələnib. Həmin gün Yasamal rayon Polis İdarəsinə müraciət edən Həsənov məhkəmə-tibb ekspertizasından keçib və ona kəllə-beyin travması aldığı barədə rəy verilib.
Zahid ötən il noyabrın 11-də Bakının Yasamal rayon məhkəməsinin qərarı ilə 2 ay müddətinə həbs olunub.
Azərbaycanda 3 jurnalist həbsdədir.
Müəlliflə əlaqə saxlamaq üçün elektron ünvan - [email protected]