Çexiya, Praqa, 21 iyun / Trend müxbir S.Nəcəfov/ Çexiyada nüfuzlu Masarik Universitetində yaradılan "Azerbaijan-Caspian Studies" Mərkəzinin məqsədi Xəzər regionunun iqtisadi, sosial, enerji təhlükəsizliyinə dair məlumatları, Azərbaycan həqiqətlərini beynəxalq elmi araşdırma mərkəzlərinə yaymaqdır.
"Bizim işimiz Azərbaycanı tanıtmaq, onunla bağlı araşdırmalar aparan elmi işçilərə yol göstərmək, ölkəmiz haqda düzgün olmayan informasiyalara çevik və elmi sübutlarla cavab verməkdir"- deyə Mərkəzin sədri Eltay Dilbazi Trend -a açıqlamasında bildirib.
Bu gün Masarik Universiteti Beynəlxalq Politologiya İnstitutunun nəzdində Azərbaycan və Xəzər regionu araşdırma Mərkəzi olan "Azerbaijan-Caspian Studies"in rəhbərinin adı açıqlanıb. Universitetdən verilən məlumata görə, bu, milliyyətcə azərbaycanlı, 1981-ci ildə Bakıda anadan olmuş Eltay Dilbazidir. Eltay Dilbazi Masarik Universiteti Sosial Elmlər fakultəsi, Beynəlxalq Əlaqələr, Politologiya və Avropaşünaslıq ixtisası üzrə doktorantdır. 1998-ci ildən Çexiyada yaşayır. Elmi məqalələri Avropanın bir çox elmi-araşdırma mərkəzləri tərəfindən dərc olunub. 2 kitab müəllifidir, 5 dildə sərbəst danışır.
Dilbazi bildirib ki, "Azerbaijan-Caspian Studies"in məqsədi regionun iqtisadi, sosial, enerji təhlükəsizliyi və digər sahələrə dair məlumatları toplayıb, hesabat hazırlamaq, onu beynəxalq elmi araşdırma mərkəzlərinə yaymaq, müxtəlif nəşrlərdə çapına nail olmaqdır.
"Bizim məqsədimiz Azərbaycanı tək enerji ehtiyatları ilə zəngin ölkə kimi yox, qədim tarixə, zəngin mədəniyyətə malik ölkə, hazırda sürətlə inkişaf edən və müasir dünyanın tərkib hissəsi olan bir dövlət kimi təqdim etməkdir" - Dilbazi məlumat verib.
Onun sözlərinə görə, Mərkəzin saytı və jurnalı sentyabr ayından fəaliyyətə başlayacaq. Universitet bu Mərkəzi ofislə təmin edib. İlin sonunda kitabxana istifadəçilərin ixtiyarına veriləcək.
Mərkəzin ilk böyük tədbiri oktyabr ayında keçiriləcək. Bu, Qafqaz və Xəzər regionunda enerji təhlükəsiliyi mövzusunda böyük elmi konfrans olacaq.
"Azerbaijan-Caspian Studies"in yaradılası barədə ilk razılaşma və Memorandum Azərbaycanın Çexiyadakı Səfiri Tahir Tağızadə və Univerisitetin rektoru professor Petr Fiala tərəfindən imzalanıb.
Masarik Universiteti nəinki Çexiyanın, eləcə də Şərqi Avropanın humanitar sahədə ən nüfuzlu universitetidir. Burada 30 min tələbə təhsil alır. İndiyədək Masarik Universitetində nəinki Qafqaz və Azərbaycan, eləcə də MDB məkanını öyrənən Mərkəzlər olmayıb.
Məqalənin müəllifi ilə [email protected] ünvanı ilə əlaqə saxlaya bilərsiniz.
