Azərbaycan, Bakı, 27 iyun / Trend , müxbir K.Zərbalıyeva/ Gəncədəki İstintaq Təcridxanasından qaçan məhkuma hökm oxunub.
Bu ilin əvvəlində 2 saylı İstintaq Təcridxanasında cəza çəkən məhkum,Goranboyun Xanqərvənd kənd sakini 27 yaşlı Rahib Zülfiqar oğlu Həşimov təcridxanadan qaçıb.
Həşimov Gəncə şəhər Nizami rayon məhkəməsinin hökmü ilə 2 il 6 ay azadlıqdan məhrum edilib.
O, cəzasını ciddi rejimli cəzaçəkmə müəssisəsində çəkəcək.
Həşimov oğurluq və dələduzluqda ittiham olunaraq, ötən ilin avqustunda 3 il 6 ay müddətinə azadlıqdan məhrum edilib. O, İstintaq Təcridxanasında təsərrüfat briqadasında çalışıb.
Bu hadisədən sonra İstintaq Təcridxanasının əməkdaşları cəzalandırılıblar.
Təcridxananın sabiq rəisinin növbə köməkçisi Ruslan Hüseynov, nəzarətçilər Elşad Mehdiyev və Mail Məmmədov barəsində məhkəmənin qərarı ilə, başqa yerə getməmək barədə qətimkan tədbiri seçilib.
Cinayət Məcəlləsinin səhlənkarlıq (314) maddəsi ilə onlar barəsində başlanmış cinayət işinin istintaqı yekunlaşıb və baxılması üçün Nizami rayon məhkəməsinə göndərilib.
Nizami rayon məhkəməsindən Trend -a bildirilib ki, iş üzrə hazırlıq iclası keçirilib və məhkəmə baxışı iyulun 2-nə təyin olunub.
Məhkumun müəssisədən qaçışından sonra təcridxananın rəisi Firdovsi Niftəliyev və onun müavini İbrahim Məmmədov, ədliyyə naziri Fikrət Məmmədovun əmri ilə, tutduqları vəzifədən və ədliyyə orqanlarından xaric ediliblər.
Təcridxanada aparılan daxili təhqiqat nəticəsində müəssisənin 9 əməkdaşı tutduqları vəzifədən və ədliyyə orqanlarından çıxarılıblar.
Ədliyyə nazirinin əmri ilə Şüvəlandakı 3 saylı İstintaq Təcridxanasının rəis müavini Zahid Hüseynov Cəncədəki 2 saylı İstintaq Təcridxanasına rəis təyin olunub.
Müəlliflə əlaqə saxlamaq üçün elektron ünvan - [email protected]
