...

Azərbaycanda gələn ilin sonunadək inzibati məhkəmələr fəaliyyətə başlayacaq

Cəmiyyət Materials 18 Sentyabr 2008 15:30

Trend-i buradan izləyin

Azərbaycan, Bakı, 18 sentyabr / Trend , K.Zərbalıyeva/ 2009-cu ilin sonunadək Azərbaycanda inzibati məhkəmələrin yaradılması prosesi yekunlaşacaq.

Milli Məclisin İnzibati və hərbi qanunvericilik şöbəsinin müdiri Səyyad Kərimov cümə axşamı Trend -a bildirib ki, inzibati məhkəmələrin fəaliyyət göstərən məhkəmələrin tərkibində ayrıca kollegiya kimi, yaxud da müstəqil fəaliyyət göstərməsi məsələsi hələ ki həll olunmayıb və bununla bağlı araşdırmalar davam etdirilir.

"Bu istiqamətdə araşdırmalar başa çatandan sonra İnzibati-Prosessual Məcəllənin layihəsində bu məhkəmələrin hansı formada fəaliyyət göstərəcəyi dəqiq müəyyən olunacaq", - deyə Kərimov vurğulayıb.

İkinci oxunuşda qəbul edilmiş qanun layihəsinə görə, inzibati məhkəmələr iki pilləli olacaq. Apellyasiya məhkəmələrində və Ali Məhkəmədə İnzibati mübahisələrə dair işlər üzrə kollegiyalar yaradılacaq. Apellyasiya məhkəmələrində yaradılacaq kollegiyalar birinci instansiya qismində, Ali Məhkəmədə formalaşdırılacaq kollegiya isə ikinci instansiya qismində fəaliyyət göstərəcək.

Kərimov bildirib ki, bu məhkəmələrlə bağlı konkret qərar qəbul ediləndən sonra, həmin məhkəmələrə hakimlərin seçilməsi, kadrlarla təmin olunma, həmin məhkəmələrə inzibati binaların ayrılması və digər bu kimi məsələlər 2009-cu ilin sonunadək həllini tapacaq.

Şöbə müdiri İnzibati-Prosessual Məcəllənin MM-in payız sessiyasında qəbul ediləcəyini deyib. Bu məcəllə vətəndaş-məmur münasibətlərində yaranan mübahisələrin qısa zaman çərçivəsində çevik həll olunmasına imkan verəcək.

Ekspertlər hesab edirlər ki, inzibati məhkəmələrin fəaliyyətə başlaması digər məhkəmə instansiyalarına inzibati qərarlardan edilən şikayətlərin azalmasına, həmin məhkəmələrin iş yükünün aşağı düşməsinə səbəb olacaq.

Müəlliflə əlaqə saxlamaq üçün elektron ünvan- [email protected]

Xəbər lenti

Xəbər lenti