Azərbaycan, Bakı, 3 fevral / Trend , müxbir V.Məmmədova/ Azərbaycanda bəzi kinoteatrlar modernləşdiriləcək.
"Dostluq" və "Şəfəq" kinoteatrları da modernləşdiriləcək. "Nizami" kinoteatrının təmiri təxminən iki ilə başa çatacaq. Burda 5 kinozal olacaq. Kinoteatrda kino ilə yanaşı kino-tamaşa, konsert-tamaşa da göstəriləcəyi nəzərdə tutulur, - çərşənbə axşamı Trend -a Mədəniyyət və Turizm Nazirliyinin Milli filmlərin istismarı və təbliğatı sektorunun müdiri Yusif Şeyvox bidirib.
Respublikada 40-dan artıq kinoteatr var, paytaxtda müasir tələblərə cavab verə biləcək yeganə kinoteatr kimi "Azərbaycan" kinoteatrını göstərmək olar.
"Naxçıvan Muxtar Respublikasında bir neçə kinoteatr modernləşdirilib və bu gun yerli əhaliyə yüksək səviyyədə xidmət göstərir. Bundan başqa Şirvan və Sabirabad kinoteatrları da yenicə təmir olunub, müasir avadanlıqlarla təmin olunub", - deyə Şeyxov məlumat verib.
Şeyxov deyib ki, nazirlik respublika üzrə təmirə zəruri ehtiyacı olan 15-16 kinoteatrın siyahısını hazırlayıb və müvafiq nazirliklərə təqdim edib. Onlar əsasən əyalət kinoteatrlarıdır.
"Bir vaxtlar Azərbaycanda böyüklüyünə görə ikinci kinoteatr sayılan Gəncənin "Bakı" kinoteatrının isə böyük mədəniyyət obyektinə çevrilməsi nəzərdə tutulub. Layihəyə əsasən burda kino-tamaşa müəssisəsi yaradılmaqla yanaşı, həm də Gəncə filarmoniyasının da fəaliyyət göstərməsi gözlənilir", - deyə Şeyxov əlavə edib.
Məqalə müəllifi ilə əlaqə ünvanı: [email protected]
