Azərbaycan, Bakı, 4 noyabr / Trend , müxbir H.Bağırov/
"Fransa-Azərbaycan" Səhmdar Cəmiyyətinin rəhbərinin barəsindəki hökm qüvvədə saxlanılıb.
Trend -un məlumatına görə, çərşənbə günü Bakı Apellyasiya Məhkəməsində cəmiyyətin keçmiş rəhbəri Şahin Musayevin barəsində Ağır Cinayətlərə Dair İşlər üzrə Məhkəmənin hökmündən verdiyi apellyasiya şikayətinə baxılıb.
Musayev 9 il azadlıqdan məhrum etmə cəzasının dəyişdirilməsi və onun barəsində azadlıqdan məhrum etmə ilə əlaqədar olmayan cəza təyin edilməsini istəyib. Məhkəmə Musayevin apellyasiya şikayətini təmin etməyib və onun barəsində olan hökmü qüvvəsində saxlayıb.
Musayev 11 il axtarışda olub. Fransanın məşhur "Peugeot" şirkətinin Bakıdakı nümayəndəliyinə və "Fransa-Azərbaycan" SC-yə rəhbərlik etmiş Musayev 11 il əvvəl Azərbaycan Beynəlxalq Bankından götürdüyü 200 min ABŞ dollarını mənimsəməkdə təqsirli bilinir. Həmin vaxtdan Cinayət Məcəlləsinin 88-ci (mənimsəmə) maddəsi ilə (köhnə redaksiyada) barəsində axtarış elan olunmuş Musayev uzun müddət Fransada gizlənib.
Nərimanov rayon Polis İdarəsinin 16-cı Polis Bölməsi əməkdaşlarının keçirdiyi əməliyyat-axtarış tədbirləri nəticəsində Musayev 2008-ci ilin oktyabrın 28-də Bakı şəhərindəki evində həbs edilib.
Təqsirləndirilən şəxs Cinayət Məcəlləsinin 179.3.2-ci (külli miqdarda mənimsəmə və ya israf etmə) maddəsi ilə ittiham olunub. Məhkəmənin hökmü ilə 9 il müddətinə azadlıqdan məhrum edilib.
Məqalə müəllifi ilə əlaqə ünvanı: [email protected]