Azərbaycan, Bakı, 19 yanvar /Trend, müxbir K.Zərbalıyeva/
Azərbaycan Ali Məhkəməsində ötən il kredit borclarının qaytarılması ilə bağlı mübahisələr artıb.
Ali Məhkəmədən çərşənbə günü Trend-ə verilən məlumata görə, əvvəlki illərlə müqayisədə 2010-cu ildə mülki işlər üzrə məhkəmə kollegiyasında bu qəbildən olan iddialar xeyli çoxalıb.
Kollegiyanın icraatında olan mülki mübahisələrin böyük əksəriyyəti isə mənzildən istifadə, mülkiyyətin bölünməsi ilə bağlıdır.
Məhkəmədən bildirilib ki, kollegiyanın icraatında boşanma ilə bağlı mübahisələr azlıq təşkil edib. Boşanma ilə bağlı mübahisələrin əksəriyyəti birinci instansiya və apellyasiya instansiyasında həllini tapdığı üçün bu qəbildən olan şikayətlər Ali Məhkəməyədək gəlmir.
Ötən il Ali Məhkəmənin Mülki işlər üzrə kollegiyasında baxılan işlərin sayı 6,4 faiz artıb.
Ümumilikdə isə ötən il Ali Məhkəmədə 5 min 354 işə baxılıb. 2009-cu ildə bu göstərici 4 min 862 olub.