Azərbaycan, Bakı, 23 iyun /Trend/
Azərbaycanda şimal və cənub rayonlarının çaylarında sululuq səviyyəsi ongünlük normadan dörd dəfə yüksəkdir.
Trend-in məlumatına görə, Ekologiya və Təbii Sərvətlər Nazirliyinin Milli Hidrometeorologiya Departamentindən bildirilib ki, iyunun 22-də axşam saatlarından başlayaraq yağan leysan xarakterli yağışlar nəticəsində Böyük Qafqazın əksər çaylarında sululuq kəskin artıb, Türyançay, Ağçay, Hamamçay və Kürmükçay çaylarından qısamüddətli daşqınlar olub.
Hazırda Quba-Xaçmaz və Lənkəran-Astara bölgəsi çaylarında sululuq ongünlük normadan dörd dəfəyədək, Balakən-Şəki bölgəsi çaylarında isə iki dəfəyədək çoxdur.
Nazirliyin məlumatında tranzit çaylarda hazırkı vəziyyətlə bağlı bildirilir ki, Kür çayının Qıraqkəsəmən məntəqəsində su sərfi 450 m3/san, yəni ongünlük normanın 111 faizini, Qanıx çayının Əyriçay məntəqəsində isə su sərfi 190 m3/san (ongünlük normanın 114 faizini) təşkil edir.
Kür çayının Surra məntəqəsində hazırda suyun səviyyəsi 545 sm (2010-cu il iyunun 23-də səviyyə 799 sm), Şirvanda 474 sm (723 sm), Salyanda 515 sm (719 sm), Bankədə 327 sm (421 sm), Araz çayının Novruzlu məntəqəsində isə 315 sm (535 sm) təşkil edir.