Azərbaycan, Bakı, 4 avqust /Trend, müxbir T.Cəfərov/
"Xəzər dənizinin dəniz ətraf mühitinin mühafizəsi haqqında" Çərçivə Konvensiyasını imzalayan ölkələrin avqustun 10-11-də Qazaxıstanda iclası keçiriləcək.
Trend-in məlumatına görə, Qazaxıstanın Aktau şəhərində keçiriləcək iclasda 2 protokolun imzalanması nəzərdə tutulur.
"Xəzər dənizinin dəniz ətraf mühitinin mühafizəsi haqqında" Çərçivə Konvensiyası 2003-cü il noyabrın 4-də Tehranda imzalanıb.
Ekologiya və Təbii Sərvətlər Nazirliyinin mətbuat xidmətindən cümə axşamı Trend-ə bildirilib ki, tədbirdə Azərbaycanı ekologiya və təbii sərvətlər nazirinin müavini Rauf Hacıyevin başçılıq etdiyi nümayəndə heyəti təmsil edəcək.
Xəzəryanı ölkələrə Azərbaycan, Rusiya, İran, Qazaxıstan və Türkmənistan daxildir.