Azərbaycan, Bakı, 4 fevral / Trend, müxbir H.Vəliyev /
"Azərbaycanın "SayberNet" İT şirkəti ölkənin yanacaqdoldurma məntəqələrində (YDM) quraşdırılan nəzarət-kassa aparatları üçün "SayberNet YDM POS v2.4" proqram təminatının IBM SurePOS 100 yenilənmiş versiyasını təqdim edib", - bu barədə şənbə günü Trend-ə şirkətdən məlumat verilib.
"Hazrda YDM-də bundan əvvəl yerləşdirilən proqram təminatının yenilənməsi işləri aparılır", - şirkətdən bildiriblər.
Sistem inteqratoru funksiyasını yerinə yetirən Azərbaycanın "SayberNet" İT şirkəti sistemin texniki qurulması işlərinin həvalə olunduğu struktur kimi seçilib. Kassa aparatlarının tədarükçüsü "Caspel" şirkətidir, YDM-də onların quraşdırılması ilə isə "Pos-service" şirkəti məşğul olur.
Yeni nəzarət-kassa aparatlarının tətbiqinə Azərbaycan Nazirlər Kabinetinin "Azərbaycanda yanacaqdoldurma məntəqələrində nəzarət-kassa aparatlarının tətbiqi haqqında" qərarına uyğun başlanılıb.
Sənədə əsasən, 2012-ci il yanvar ayının 1-nə qədər hazırda Azərbaycan ərazisindəki yanacaqdoldurma məntəqələrində istifadədə olan nəzarət-kassa aparatlarının onların istehlakçıları tərəfindən Dövlət reyestrinə daxil edilmiş, xüsusi konstruksiyalı və texniki göstəricilərə malik, o cümlədən çek verilmədən neft məhsullarının və maye qazın alıcıya satılmasını qadağan edən yeni nəzarət-kassa aparatları ilə əvəz olunması və onların qeydiyyata alınması ilə bağlı bir sıra işlərin həyata keçirilməsi nəzərdə tutulur.
Bir müddət əvvəl "Castel" şirkətindən deyildiyi kimi, bu günədək ölkənin bütün iri YDM-i artıq yeni nəzarət-kassa aparatları ilə təmin olunub.
Ölkəyə gətirilən belə aparatların ümumi sayı 2,5 min ədəd təşkil edir, respublikada təxminən 850 YDM fəaliyyət göstərir.
