Azərbaycan, Bakı, 12 iyul /Trend, müxbir T.Cəfərov/
İranın yollar və şəhərsalma nazirinin müavini və Milli Hidrometeorologiya Təşkilatının sədri Bəhram Sənayi Azərbaycanda rəsmi səfərdədir. Bu barədə Trend-ə İranın Azərbaycandakı səfirliyinin mətbuat xidmətinin rəhbəri Abbas İsgəndəri məlumat verib.
İsgəndəri deyib ki, Sənayi səfər çərçivəsində Azərbaycanın Ekologiya və Təbii Sərvətlər Nazirliyinin Milli Hidrometeorologiya Departamentinin direktor əvəzi Rza Mahmudovla görüşəcək və ikitərəfli əlaqələrin inkişaf etdirilməsi haqqında danışıqlar aparacaq.
Onun sözlərinə görə, səfər zamanı tərəflər Xəzəryanı ölkələrin hava, hidrologiya və Xəzərin ekoloji mühafizəsi ilə məşğul olan müvafiq komitələri tərəfindən qeyd edilən sahələr üzrə imzalanması nəzərdə tutulan sazişlə bağlı müzakirələr aparacaq.
Sənayinin Bakıya səfəri ötən gün başlayıb və cümə gününə kimi davam edəcək.
Bəhram Sənayi Azərbaycana səfəri öncəsi İRNA xəbər agentliyinə müsahibəsində bildirmişdi ki, İran və Azərbaycan arasında hidrometeorologiya sahəsində əməkdaşlıq və hava proqnozu haqqında məlumatların mübadiləsi zəruridir.
Sənayi Xəzər dənizində hava proqnozu haqqında məlumatların vaxtında çatdırılması məqsədilə region ölkələri arasında əməkdaşlığın artırılmasının vacibliyini vurğulayıb.