Azərbaycan, Bakı, 14 avqust /Trend/
Azərbaycanda dövlət qulluğunda 416 vakant yerə müsabiqə elan olunub.
Azərbaycan Respublikasının Prezidenti yanında Dövlət Qulluğu Məsələləri üzrə Komissiyadan Trend-ə verilən məlumata görə, müsabiqə 17 dövlət orqanındakı 416 vakant vəzifənin tutulması üçün elan olunub.
Müsabiqəyə çıxarılan vakant dövlət qulluğu vəzifələrindən 404-ü mərkəzi icra hakimiyyəti orqanlarının mərkəzi aparatları və yerli bölümlərində, 12-sı isə birinci instansiya məhkəmə orqanlarının aparatlarındadır.
Dövlət qulluğuna qəbul edilmək üçün vətəndaşlar müsabiqə elan edilən gündən etibarən 30 gün ərzində Komissiyaya müraciət edə bilərlər.
Müraciət forması elektron, şəxsən (bazar ertəsi - cümə günləri saat 09:00-dan 12:30-dək və 14:00-dan 17:30-dək) və yaxud poçt vasitəsilə kağız daşıyıcılarla təqdim edilə bilər.