Azərbaycan, Bakı, 1 dekabr /Trend, müxbir İlhamə İsabalayeva/
Azərbaycan dilinə yeni daxil olan alınma sözlərin izahlı lüğəti hazırlanır. Bu lüğət gələn il istifadəyə veriləcək. Bunu Trend-ə AMEA-nın Nəsimi adına Dilçilik İnstitutunun Monitorinq şöbəsinin müdiri Qulu Məhərrəmli deyib.
Onun sözlərinə görə, təxminən 1990-cı ilin əvvəllərindən Azərbaycan dilinə daxil olmuş sözlər müxtəlif sahələrdə - texnologiya, ictimai, hüquq sahələrində, mətbuatda işlənir. Ancaq bunların çox az qisminin lüğətlərdə izahı verilib. Bəzilərinin izahı isə yanlış verilib: "Dilimizə yeni daxil olan sözləri toplamışıq. Bunların bir hissəsi bu il buraxılmış "Məktəblilərin alınma sözləri" adlı lüğətdə dərc edilib. Həmin lüğətdəki sözlər daha çox texnologiya və ictimai həyatda işlənən sözlərdir".