Azərbaycan, Bakı, 3 iyul /Trend/
"İMD Center qardaş Türkiyə mətbuatı ilə körpü yaradaraq sıx əməkdaşlıq etməklə bağlı layihəyə start verib". Trend xəbər verir ki, bu barədə açıqlamasında hazırda Türkiyədə səfərdə olan, İMD Center (İntergovernmental Media & Diplomatik Center)-in vitse prezidenti İlkin Abdiyev deyib.
Onun sözlərinə görə, İMD Center-in qarşısına qoyduğu məqsədlərdən biri də, qardaş Türkiyə mətbuatı ilə hərtərəfli əməkdaşlıq etmək idi: "Biz buna nail olduq. Türkiyə səfərim çərçivəsində Türkiyə Azərbaycan Media Forumunun demək olar ki, təməlini qoyduq. İndi mütəmadi olaraq, bizim Türkiyə mətbuatında məqalələrimizi görə biləcəksiniz. Hesab edirəm bu layihə iki dövlət, bir millət olan Türkiyə Azərbaycan arasında yeni nəfəs olacaq və iki dövlətin mövqeyinə xidmət edəcək. Türkiyə Azərbaycan Media Forumunun sədri, Türkiyəli yazar və yetəri qədər təcrübəli mətbuat nümayəndəsi Camal Baş təyin olundu".
İ.Abdiyev eyni zamanda, bu günlərdə İMD Center-in yeni və olduqca gərəkli bir layihəsinin icrası ilə bağlı da danışıb: "İMD Center Türkiyə ilə sadəcə media ilə bağlı deyil, digər istiqamətdə də əlaqələrin inkişafına hesablanmış əməkdaşlıqlar qurmağa müvəffəq olub. Sadəcə, bu layihənin nədən ibarət olduğunu hələ ki, açıqlamaq istəməzdim. Onu deyə bilərəm ki, Türkiyə səfərimiz çərçivəsində Türkiyə Bələdiyyələr Birliyinin baş katibi, sayın Hayrəddin Güngörlə də görüşümüz oldu. Bu görüş isə yeni əməkdaşlığın əsasını qoydu".